Güzəştli mənzilləri kimlər ala bilər?

Prezident İlham Əliyevin fərmanı ilə güzəştli ipotekadan yararlanan şəxslərin siyahısına dəyişiklik edilib. Sözügedən fərmana əsasən, gənc ailənin üzvü olan, azı 5 il jurnalist işləyən və Media Reyestrinə daxil edilmiş şəxslər, eləcə də, gənc ailənin üzvü olmayan ən azı 15 il jurnalist işləyən və Media Reyestrinə daxil edilmiş şəxslər güzəştli ipoteka krediti ala biləcəklər.

“Qafqazinfo” xəbər verir ki, bu yenilik Azərbaycanda güzəştli ipoteka anlayışının nə olması və kimlərin bu növ ipotekanı ala bilməsi məsələsini yenidən gündəmə gətirib. Mövzunun aktuallığını nəzərə alaraq, güzəştli ipoteka anlayışını və onunla bağlı əsas şərtləri təqdim edirik:

Güzəştli ipoteka krediti İpoteka və Kredit Zəmanəti Fondu (İKZF) tərəfindən təqdim olunan kreditdir. Güzəştli ipoteka kreditinin maksimal məbləği 100 000 AZN-dir. Müraciət edənlər minimum 10% ödəməklə, maksimum 30 il müddətinə kredit götürə bilərlər. Güzəştli ipoteka krediti üzrə maksimal illik faiz dərəcəsi zəmanət verilməmiş kreditlər üzrə 4%-dir.

İpoteka kreditləri üzrə güzəştlərdən hansı şəxslər istifadə edə bilər?

Gənc ailənin üzvü olan aşağıdakı şəxslər:

Şəhid ailəsinin üzvü (əri/arvadı, övladları);

Vətən Müharibəsi Qəhrəmanı (özü, əri/arvadı, övladları);

Azərbaycanın Milli Qəhrəmanı (özü, əri/arvadı, övladları);

Məcburi köçkün və ya ona bərabər tutulan şəxs;

Ən azı 3 il dövlət qulluğunda qulluq edən, o cümlədən dövlət qulluğunun xüsusi növündə xidmət keçən şəxs;

Ən azı 3 il dövlət ümumtəhsil müəssisəsində müəllim işləyən şəxs;

Fəlsəfə doktoru elmi dərəcəsi olan şəxs;

İdman sahəsində xüsusi xidmətləri olan şəxs (fəxri bədən tərbiyəsi və idman xadimi, ölkə miqyaslı yarışların qalibi (I yer), beynəlxalq miqyaslı yarışların mükafatçısı (I, II və ya III yer);

Elmlər doktoru elmi dərəcəsi olan şəxs;

Ən azı 15 il dövlət qulluğunda qulluq edən şəxs, o cümlədən dövlət qulluğunun xüsusi növündə xidmət keçən şəxs;

Ən azı 3 il hərbi xidmətdə olan (müddətli həqiqi hərbi xidmətdə olan hərbi qulluqçulardan başqa), həmçinin ehtiyata və istefaya buraxılmış Azərbaycan Respublikasının hərbi qulluqçuları(“Hərbi vəzifə və hərbi xidmət haqqında” Azərbaycan Respublikası Qanununun 41.0.6-cı, 41.0.7-ci, 41.0.8-ci, 41.0.10-cu, 42.0.3-cü, 42.0.4-cü və 42.0.5-ci maddələrində nəzərdə tutulan hallarda ehtiyata və ya istefaya buraxılmış hərbi qulluqçular istisna olmaqla);

Ən azı 3 il daxili işlər orqanlarında xidmət keçən xüsusi rütbəsi olan şəxs;

Ən azı 3 il elmi vəzifədə işləyən elmi işçilər;

Ən azı 15 il dövlət ümumi təhsil müəssisəsində müəllim işləyən şəxs.

Azı 5 il jurnalist işləyən və Media Reyestrinə daxil edilmiş şəxslər, eləcə də, gənc ailənin üzvü olmayan ən azı 15 il jurnalist işləyən və Media Reyestrinə daxil edilmiş şəxslər.

Qeyd edək ki, güzəştli ipoteka kreditindən istifadə etmək hüququ olan ailə və ya şəxs bu hüquqdan yalnız bir dəfə istifadə edə bilər.

https://qafqazinfo.az/

• 10.02.2022
• 1055