Tikinti və təmir işlərində müqavilə bağlamağın hüquqi vacibliyi

Bakıda və ümumilikdə ölkə üzrə tikinti və təmir işlərinə tələbatın artması ilə yanaşı, bu sahədə yaranan hüquqi problemlərin də sayı artır. Əksər hallarda mübahisələr yazılı müqavilə olmadan görülən işlərdən sonra baş verir. Halbuki, istər ustayla, istər podratçı, istərsə də dizaynerlə əməkdaşlığa başlamazdan öncə rəsmi müqavilə bağlamaq həm sifarişçi, həm də icraçı üçün hüquqi qoruma təmin edir.

Tikinti və ya təmir işləri zamanı yazılı müqavilə – tərəflərin öhdəliklərini, görüləcək işin həcmini, keyfiyyət tələblərini və ödəniş qaydalarını dəqiq müəyyənləşdirir. Bu sənəd hər iki tərəf üçün hüquqi əsas yaradır və gələcəkdə yarana biləcək anlaşılmazlıqların qarşısını alır. Məsələn, işin gecikməsi, material keyfiyyətinin aşağı olması və ya əlavə xərc tələbi kimi hallarda, yalnız müqavilə tərəflərin məsuliyyətini sübut etməyə kömək edir.

Müqavilə olmadıqda, tərəflər arasında razılaşmalar yalnız “şifahi” şəkildə olur və belə hallarda məhkəmə qarşısında sübut bazası demək olar ki, olmur. Halbuki, yazılı sənəd — qanuni dəlil kimi qəbul olunur.

Bu sənəd həmçinin müqavilə şərtlərinin pozulması halında tərəfin zərərinin ödənilməsini və hüquqlarının bərpasını təmin etməyə imkan verir.

Yaxşı hazırlanmış tikinti və təmir müqaviləsində aşağıdakı bəndlər mütləq yer almalıdır:

Görüləcək işlərin tam təsviri;
İşin icra müddəti və mərhələlər;
Ödənişin məbləği və qaydası;
Materiallara cavabdehlik;
Müqavilə pozulduqda məsuliyyət mexanizmi;
Təhvil-təslim aktı və zəmanət müddəti.

Tikinti və təmir sahəsində yazılı müqavilə yalnız formal sənəd deyil, hüquqi təhlükəsizlik zəmanətidir. O, həm sifarişçini, həm də icraçını qoruyur, münasibətləri şəffaf və ədalətli edir. Buna görə də işə başlamazdan əvvəl “etibar” yox, qanuni zəmanət üstün tutulmalıdır.

Hazırladı 

Məhərrəmova Duyğu

• 30.10.2025
• 37