Bakıda bu binalarda ən bəsit yanğın baş versə... - Memardan sensasion açıqlama

Ötən gün Respublika Perinatal Mərkəzində 4 uşağın tələf olması ilə nəticələnən faciəvi yanğından sonra yaşayış və digər təyinatlı binalarda fövqəladə hal zamanı təxliyə planı və təhlükəsizlik tədbirlərinin nə dərəcədə yetərli olması məsələsini gündəmə gətirib. 

Vətəndaşların bir çoxu xüsusilə yaşayış binalarında yanğın və digər fövqəladə hallar zamanı təhlükəsizlik çıxışlarının və təxliyə qapılarının yetərincə effektiv olmamasını dilə gətirir. 

Sözügedən mövzu ilə bağlı memar Muxtar Ərturan fikirlərini Yenisabah.az-la bölüşüb. Memar xüsusən sovet dövründən qalma binalarda təxliyə və təhlükəsizliklə bağlı problemlərin olduqca çox olduğunu qeyd edib. 

“Ölkəmizdə post-sovet dövründən qalan binaların əksəriyyətində, demək olar ki, 90 faizində təxliyə planına uyğun olaraq çıxışlar yoxdur. Hazırda tikilən yeni tikili binalarda isə layihələndirmə mərhələsində müasir tikinti qaydalarına əsaslandırılan təxliyə planları hazırlanmalı və icraçılar tərəfindən layihədə qeyd olunan standartlara uyğun həyata keçirilməlidir. 

Lakin əfsuslar olsun ki, Bakı şəhərində bir sıra binalarda təxliyə planları, havalandırılan dəhliz və pilləkənlər belə standartlara uyğun qoyulmur. Qoyulan yerlərdə isə qapılarda, pəncərələrdə, dönüşlərdə müəyyən standartlar pozulub. 

Lakin onu da qeyd edim ki, paytaxtın 28 May, Nərimanov və Xətai ərazilərində yerləşən binaların əksəriyyətində bu problem demək olar ki, aradan qaldırılıb. Əsasən təxliyə və təhlükəsizliklə bağlı ciddi problemlərin özünü göstərdiyi binalar 2009, 2012 və 2014-cü illərdə tikilən binalardır. Bu tip binalara daha çox Sabunçu və Badamdar ərazilərində rast gəlinir”.

Muxtar Ərturan fövqəladə hallara qarşı ehtiyat tədbirlərinin yetərincə görülməsi baxımından  aidiyyəti qurumların üzərində daha məsuliyyət düşdüyünü bildirib:

“Yanğın və digər fövqəladə hallara qarşı ehtiyat tədbirlərinin yetərincə görülməsi baxımından Fövqəladə Hallar Nazirliyinin və ya yerli icra orqanlarının aparatlarında müəyyən məsul şəxslər və yaxud bölmələr ayrılmalıdır ki, onlar tikinti prosesində və sonrası gedən işlər zamanı standartları pozulmuş binalarda qüsur aktları tərtib etsinlər və onu müəyyən orqanlara təqdim etməklə bu məsələlərin profilaktikası ilə məşğul olsunlar. 

Əlavə olaraq bu kimi məsələlərlə bağlı mütəmadi yoxlanışlar aparılmalıdır. Ən bəsit formada baş verən yanğınlar zamanı belə təxliyə planına əsasən havalandırılan dəhlizlər və pilləkənlərdə insanların çıxışı üçün plastik və dəmir qapılar qoyulur. Əslində isə bunlar yanmayan, birtərəfli itələməklə açılan qapılar olmalıdır. Əfsuslar olsun ki, bu tip qapılar daha çox plastik materialdan və dəmirdən olur. Bu isə kütləvi formada təxliyə zamanı ciddi problemlər yaradır. Belə hallar istər yeni tikililərdə, istərsə də köhnə tikililərdə yetərincə çoxdur”.

Nazim Hacıyev

• 17.01.2024
• 349