Yeni mənzil (həmçinin hələ tikintisi başa çatmamış) alanların hüquqları və tez-tez rast gəlinən pozuntular

Son illərdə Bakıda yeni tikililərə maraq artdıqca, təəssüf ki, alıcıların hüquqlarının pozulması halları da çoxalıb. Xüsusilə tikintisi hələ tam başa çatmamış binalardan mənzil alanlar, bəzən müqavilə şərtlərini tam anlamadan qərar verir və bu, sonradan ciddi problemlərə yol aça bilər.

Yeni mənzil alan şəxs ilk növbədə müqavilədə göstərilən bütün şərtləri diqqətlə oxumalıdır. Buraya menzilin sahəsi, mərtəbəsi, təhvil tarixi, ödəniş planı və keyfiyyət zəmanəti kimi vacib məlumatlar daxildir. Müqavilədə bu detallar aydın şəkildə yazılmayıbsa, alıcı gələcəkdə haqlı olsa belə, sübut etməkdə çətinlik çəkə bilər. Tikinti şirkətləri adətən menzilin təhvil tarixini vəd edir, lakin bəzən layihənin gecikməsi və ya keyfiyyət problemləri yaranır. Alıcı müqavilədə təhvil tarixinin dəqiq göstərilməsini və gecikmə halında cərimə və ya kompensasiya şərtinin yazılmasını tələb edə bilər.

Bundan əlavə, təhvil verilmiş menzildə texniki qüsurlar aşkarlanarsa, tikinti şirkəti zəmanət müddəti ərzində bu problemləri aradan qaldırmağa borcludur. Yeni menzil tam hazır olduqdan sonra alıcı çıxarış (kupça) əldə etməlidir. Lakin bəzi hallarda tikinti şirkətləri mənzili alıcıya təqdim etsə də, rəsmi qeydiyyat prosesi uzadılır. Alıcı bu mərhələdə Əmlak Məsələləri Dövlət Xidmətinə müraciət edərək, mənzilin hüquqi statusunu dəqiqləşdirməlidir.

Yeni tikili alışı zamanı hüquqşünasın dəstəyi çox önəmlidir. Təcrübəli hüquqşünas müqaviləni yoxlayır, tikinti şirkətinin lisenziyasını, torpaq sahəsinin sənədlərini və layihənin dövlət qeydiyyatını analiz edir. Bu, alıcını gələcəkdə yarana biləcək hüquqi və maliyyə itkilərindən qoruyur.

Yeni mənzil alarkən diqqətsizlik, çox vaxt maddi və hüquqi itkilərə səbəb olur. Hər bir alıcı bilməlidir ki, öz hüquqlarını qorumağın ən güclü yolu — hər addımı sənədlə və hüquqi əsasla aparmaqdır.

Hazırladı 

Məhərrəmova Duyğu

• 28.10.2025
• 257