İpoteka Fondunun xətti ilə verilən ipoteka kreditlərinin - 78%-İ BAKININ PAYINA DÜŞÜR

2023-cü il sentyabrın 30-na İpoteka və Kredit Zəmanət Fondunun (İKZF) xətti ilə Bakıda yaşayan vətəndaşlara 36,742 min ipoteka krediti verilib.

Sentyabrın 30-na İKZF-nin xətti ilə 47,067 min ipoteka krediti verilib. Beləliklə, fondun xətti ilə verilən bütün ipoteka kreditlərinin 78,1%-i Bakı şəhərinin payına düşüb.

2023-cü il sentyabrın 30-na Sumqayıtda 3,485 min, Abşeron rayonunda (Xırdalan) 3,711 min, Gəncədə 1,55 min, Naxçıvanda 587 ipoteka krediti verilib, qalan kreditlər respublikanın digər şəhərlərinin payına düşüb.

Fondun məlumatına əsasən, sentyabrın sonuna İKZF-nin müvəkkil bankları tərəfindən 2,612 milyard manat məbləğində kredit təkrar maliyyələşdirilib. Verilmiş ipoteka kreditlərinin ümumi məbləği 2 milyard 808 milyon manat, o cümlədən güzəştli kreditlər 859 milyon manat (ipoteka kreditlərinin ümumi həcminin 30,6%-i) təşkil edib.

İpoteka krediti götürənlər arasında 30-35 yaş arasında olan şəxslər (15,93 min kredit, bütün ipoteka kreditlərinin 33,85%-i), 18-29 yaş arasında olan şəxslər (15,832 min kredit, bütün ipoteka kreditlərinin 33,64%-i) və 35 yaşdan yuxarı şəxslər (15,305 min, bütün ipoteka kreditlərinin 32,52%-i) üstünlük təşkil edir.

Fondun məlumatına görə, verilmiş ipoteka kreditlərinin 94%-i çoxmərtəbəli yaşayış binalarında mənzillərin, 6%-i fərdi evlərin alınması ilə bağlıdır. İpoteka kreditlərinin 34,04%-i sahəsi 41-60 kvadratmetr, 29,35%-i sahəsi 61-80 kvadratmetr, 15%-i sahəsi 81-100 kvadratmetr olan mənzillərin alınması üçün verilib.

İpoteka yolu ilə alınan mənzillərin 33,37%-nin qiyməti 60-90 min manat, 32,24%-nin qiyməti 30-60 min manat, 18,72%-nin qiyməti 120 min manatdan artıq, 14,33%-nin qiyməti 90-120 min manat, 1,34%-nin qiyməti isə 30 min manata qədərdir.

İpoteka yolu ilə mənzil alanların 68%-i evil şəxslər, 80%-i kişilərdir. Borcalanların 61,65%-nin aylıq gəliri 1,1 min manatı ötür.

Prezident İlham Əliyev 2017-ci il dekabrın 26-da “Azərbaycan İpoteka Fondu” ASC-nin ləğv edilməsi və İpoteka və Kredit Zəmanət Fondunun yaradılması haqqında fərman imzalayıb.

Kommersiya şərtləri ilə ipoteka kreditləri manatla və yalnız Azərbaycan vətəndaşlarına verilir. Kreditlər 3 ildən 25 ilədək müddətə verilir. Kreditin maksimum həcmi 150 min manatı keçməməlidir. Kredit illik 8%-dən çox olmayan dərəcə ilə verilir. İlkin ödəniş 15-25% təşkil edir.

• 12.12.2023
• 374