Bakıda kirayə üsulu ilə mənzil almaq imkanları - Qiymətlər əlçatandırmı?

Bu günlərdə İpoteka və Kredit Zəmanət Fondu satmaq öhdəliyi ilə kirayə mexanizmi çərçivəsində Bakının Binəqədi rayonunun Cəfər Xəndan küçəsində yerləşən yaşayış kompleksindəki 213 yeni, tam təmirli mənzili vətəndaşlara təqdim etdi.

Yaşayış sahələri 1, 2 və 3 otaqlı olmaqla, aylıq ödənişləri 954 manatdan başlayır.

Mənzillərin elektron sistem üzərindən seçimi aprelin 8-dən başlayacaq.

Bəs yeni mənzillərin qiymətləri nə dərəcədə əlçatandır?

Əmlak bazarı üzrə ekspert Ramil Osmanlının sözlərinə görə, bu tip mənzillərin aylıq ödənişlərini ümumi kirayə bazarı ilə deyil, satış bazarı ilə müqayisə etmək daha doğru olardı: "Həmin mənzillərin yerləşdiyi binalar 2013-cü ildən sonra inşa edilib. Onlar tam təmirli vəziyyətdə və müəyyən avadanlıqlarla təchiz olunmuş şəkildə satışa çıxarılır. Buna görə də köhnə tikililərlə, xüsusilə də Xruşovka tipli və yaxud tam kommunal şəraiti olmayan mənzillərlə müqayisə aparmaq düzgün deyil.

Bu gün həmin ərazidə mənzillərin təmirli vəziyyətdə 1 kvadratmetrinin qiyməti azı 2 800-2 900 manatdır. Nəzərə alaq ki, İpoteka və Kredit Zəmanət Fondunun aldığı və satmaq öhdəliyi ilə kirayə mexanizmi çərçivəsində bazara çıxardığı mənzillər daha likviddir. Onlar nisbətən aşağı ölçülü, funksional, əlçatanlığı təmin etməyə yönəlmiş, daha ekonom sinfə yaxın, eyni zamanda şəraitli, tam təmirli, istilik sistemi, kombi sistemi ilə təchiz olunmuş, həyətiyanı sahəsi, yeraltı parkinqi və çıxarışı olan mənzillərdir. Özəl şirkətlər isə bu mənzilləri çıxarışsız satır”.

Ekspert bildirib ki, Fondun təqdim etdiyi bu mexanizmdə aylıq ödənişlərə yalnız əmlakın bazar dəyəri, sığorta haqqı və zəruri olan digər xərclər əlavə edilir: “Makroiqtisadi faktorlar – inflyasiya, devalvasiya və yaxud daşınmaz əmlakın qiymət dəyişiklikləri – bu ödəniş məbləğinə təsir etmir. Bu mənada hesab edirəm ki, kənardan bu rəqəmlər yüksək görünsə də, yerləşdiyi ərazi, infrastruktur və ərazi üzrə qiymətlər baxımından bazara adekvatdır”. 

• 08.04.2025
• 731